Já, það kom loksins gott verður hér í dag. Rigningin farin og komin þessi líka fína sól. Temmilega heitt, eitthvað um 27 stiga hiti.

Við Óli fórum á fætur um kl. 9, höfðum okkur til og fórum niður í Tailwind. Óli fór í fyrsta flugtímann hérna úti og líkaði vel að sjálfsögðu! Ég dólaði mér bara niður til Pinal og til baka á meðan hann var að fljúga.

Þegar við komum til baka fengum við okkur að borða á The Hanger Café, sem er á vellinum. Við fórum með Robert og Eric kennurunum hjá Tailwind. Fyrir utan veitingastaðinn sáum við tvíþekju. Ég hafði orð á því við strákana hvað ég væri til í að prófa að fljúga svoleiðis og jafnvel prófa smá listflug. Robert sagði mér þá frá því að á Williams Gateway flugvellinum hérna við hliðina á okkur er hægt að fá að prófa listflugvélar og fara jafnvel í "Dog fight"! Langar geðveikt að prófa það! Hann ætlaði að athuga það fyrir mig og ef það er ekki of dýrt þá fer ég pottþétt! Svo sagði hann mér líka að það væri hægt að fara í flug á þessari tvíþekju sem ég minntist á áðan þannig að maður kanski gerir það bara líka!

Það lítur svo allt út fyrir það að ég fari að fljúga tveggja hreyfla vélinni á morgun. Robert ætlaði að fara með mér á hana, en hann átti eftir að fljúga einhverja tvo klukkutíma til að uppfylla skilyrði tryggingafélagana. Vona að það gangi eftir. Þá fer ég að fljúga einn um kl. 10 og svo á tveggjahreyfla vélinni eftir hádegi með Robert.

Planið er að fara á tveggjahreyfla vélinni í smá flug til að kynnast henni og ganga úr skugga um að allt virki eins og það eigi að gera, en vélinni er ekki flogið mikið. Veit nú ekki hvort það er gott eða slæmt! Ef allt er eins og það á að vera er planið að taka nokkrar nokkura daga ferðir um Bandaríkin, eins og til Seattle til að byrja með og svo jafnvel alveg yfir á austurströndina! En þetta kemur allt betur í ljós síðar.

Eftir hádegi fórum við Óli saman að fljúga, þ.e. Óli kom með mér. Ég fór nú bara aftur niður á Pinal til að sýna Óla, en þar eru þeir með allar stóru þoturnar sem á að rífa niður í varahluti. Það var ágætt. Þið eruð ágæt...